• նամակագրական կապ ունենան իրենց համակուրսեցիների հետ և հաղորդակցվեն ֆորում-քննարկումների, չաթի, Skype-ի, ձայնա- և տեսակոնֆերանսների միջոցով,
• ընթերցեն և քննարկեն օնլայն տեքստերն ու նյութերը,
• աշխատեն փոքր խմբերով և անհատապես` կիրառելով օնլայն գործիքների մի ամբողջ համակարq:

Դասընթացի հիմնական նպատակն է ուսանողներին ներկայացնել հայ երաժշտության պատմության ներածությունը և այդ մշակույթի հիմնական բաղադրիչներն իրենց բնութագրերով: Դասի ընթացքում ներկայացվում են հայ երաժշտության երկու խոշոր բաժանումները` մոնոդիկ երաժշտությունն ու կոմպոզիտորական արվեստը: Ներկայացվում են մոնոդիկ երաժշտության երեք հիմնական ենթաճյուղերը` հայ ժողովրդական երաժշտական ստեղծագործությունը կամ երաժշտական ֆոլկլորը, հայ ժողովրդապրոֆեսիոնալ երաժշտական ստեղծագործությունը, որը հին և միջնադարյան Հայաստանում հայտնի էր գուսանների արվեստով, ապա` աշուղների և, վերջապես, հայ միջնադարյան պրոֆեսիոնալ երաժշտաբանաստեղծական արվեստը, որը մեզ է հասել որպես հայ հոգևոր կամ եկեղեցական երգարվեստ: Դասընթացը մատչելի է մեծ լսարանի համար:

Անհրաժեշտ չէ տպագրել օնլայն նյութերը: Դրանք դասերի մասն են կազմում: Ուսանողները պետք է կարդան, լսեն, դիտեն ամբողջ նյութը և կատարեն բոլոր առաջադրանքները:
Օնլայն նյութերը կազմված են հասարակայնորեն հասանելի մասնագիտական պատմական գրականության, գիտական ուսումնական ծրագրերի, հայ և օտարազգի հեղինակների ուսումնասիրությունների, բազմալեզու աշխատանքների և հրապարակումների հիման վրա:

Դասընթացն ավարտելուց հետո ուսանողները ծանոթ կլինեն հայկական մշակույթի մի բաղադրիչի` երաժշտության հետ: Ձեռք բերած գիտելիքների շնորհիվ ուսանողը կկարողանա ճիշտ դասակարգել և բնութագրել հայկական երաժշտական մշակույթի բաղկացուցիչ մասերը, ինչպես նաև նկարագրել այդ մշակույթի ձևավորումը, գոյատևումը և զարգացումը:

• Ներածություն (հայ երաժշտության հիմնական ճյուղերի դասակարգումն ու ընդհանուր բնութագրերը):
• Հայ ժողովրդական ստեղծագործություն, հայ ժողովրդական երաժշտական բանահյուսություն կամ հայ երաժշտական ֆոլկլոր:
• Հայ երաժշտական ֆոլկլորի չորս տեսակների ուսումնասիրությունը:
• Աշխատանքային երգեր:
• Ծիսական երգեր:
• Պատմական և վիպական երգեր:
• Հայ հոգևոր երաժշտության ձևավորումն ու զարգացումը. պատմական ակնարկ:
• Հայ հոգևոր երաժշտության ժանրերը:

Էլեկտրոնային նյութերը պատրաստված են օգտագործման, ինչպես նաև լսարանի համար մատչելի սկզբունքով: Օնլայն ուսուցիչների կողմից անցկացվող առաջադրանքներն ու օնլայն քննարկումները ուսանողներին կօգնեն ներգրավվել հայկական երաժշտության պատմության իրադարձություններն ուսումնասիրելու և մանրամասն վերլուծություն կատարելու գործընթացի մեջ: Անհատական և խմբային առաջադրանքների օգնությամբ ուսանողները կկատարեն ճշգրիտ ուսումնասիրություններ և տեղեկատվության փոխանակում: Որքան ուսանողը ներգրավված լինի ուսման մեջ, այնքան արդյունավետ կլինի վերջինս:

Դասընթացը տևում է 9 շաբաթ, ներառյալ ծանոթացման շաբաթը, և նախատեսում է ուսանողի մասնակցությունը յուրաքանչյուր շաբաթվա առնվազն 5 օրերի ընթացքում:

Ուսանողները պետք է ակտիվորեն մասնակցեն օնլայն քննարկումներին, ֆորումներին, չաթերին, մասնակցեն անհատական և խմբային աշխատանքներին, ինչպես նաև հանձնեն բոլոր առաջադրանքները սահմանված ժամկետներում:
Ուսանողները պետք է ծանոթ լինեն և ենթարկվեն ՀՎՀ-ի ակադեմիական քաղաքականությանը:

Անհատական նախագծի նկարագրությունը. յուրաքանչյուր ուսանող աշխատում է իր անհատական նախագծի վրա և ներկայացնում այն սահմանված ժամկետում: Նախագիծը պետք է հիմնված լինի դասընթացի ընթացքում ուսումնասիրված նյութի վրա: Ուսանողները նախապես պետք է օնլայն ուսուցչի հետ խորհրդակցեն ընտրած թեմայի և բովանդակության շուրջ: Այն ուսանողները, ովքեր թեման կընտրեն նախօրոք, հնարավորություն կունենան դասընթացի ընթացքում կատարված աշխատանքները և քննարկումներն օգտագործել իրենց նախագծում:

Խմբային նախագծի նկարագրությունը. խմբային նախագիծը հիմնված է համեմատական մեթոդի վրա: Ուսանողների խումբը թեմայի շրջանակներում նյութեր է հավաքում և համեմատական զուգահեռներ է անցկացնում հայոց պատմության դասընթացի տվյալ ժամանակաշրջանում Հայաստանում և իրենց երկրներում կատարված իրադարձությունների միջև: Խմբի անդամները միասին կորոշեն իրենց աշխատանքի ձևը, Word կամ PowerPoint կամ այլ թվային ծրագրերի օգնությամբ կստեղծեն աշխատանքը` ներկայացնելով կատարված համեմատությունները և ուսումնասիրությունների զուգահեռները:

Ուսանողների առաջադիմությունը կգնահատվի ամբողջ ուսումնական շրջանի ընթացքում ստացած գնահատականների հիման վրա, ինչը ձևավորվում է հետևյալ սկզբունքներով.

• 20% - մասնակցություն
• 25% - անհատական աշխատանք
• 25% - խմբային աշխատանք
• 30% - ավարտական քննություն

Առաջադրանքները պետք է հանձնել նախատեսված ժամկետներում: Այս կերպ ուսանողը հետ չի ընկնի դասերից, իսկ օնլայն ուսուցիչը հնարավորություն կունենա հետևողականորեն գնահատել աշխատանքը: Եթե աշխատանքը հանձնվում է սահմանված ժամկետից մեկ շաբաթ ուշ, ապա գնահատականը նվազում է 10%-ով (եթե իհարկե ուսանողը նախապես չի ստացել օնլայն ուսուցչի համաձայնությունը): Սահմանված ժամկետից երկու շաբաթ ուշ հանձնված աշխատանքները կընդունվեն, կստուգվեն, բայց չեն գնահատվի: Բացառություններ կլինեն միայն որոշ հարգելի դեպքերում:
Գրանցվելու համար, խնդրում ենք լրացնել արձանագրման հայտը: