Աշխարհի տարբեր երկիրներ ապրող ՀՀՀ-ի ուսանողները տօնեցին Երեւանի 2800-ամեակը։ Անոնք երգեցին մայրաքաղաքի օրհներգը եւ մասնակցեցան քաղաքի պատմութեան, ճարտարապետութեան ու մշակութային աւանդութիւններուն նուիրուած առցանց ձեռնարակներուն։

ՀԲԸՄ-ի Լազար Նաճարեան -Գալուստ Կիւլպէնկեան Կեդրոնական վարժարանը (Հալէպ, Սուրիա), ՀԲԸՄ-ի Մանուկեան-Դեմիրճեան աւագ դպրոցը, (Գանոկա Փարք, ԱՄՆ), ՀԲԸՄ-ի «Հայորդեաց Օր» շաբաթօրեայ դպրոցը (Մոնթրէալ, Գանատա), Մեսրոպ Մաշտոցի անուան կիրակնօրեայ դպրոցը (Մատրիտ, Սպանիա), Սուրբ Սարգիս վարժարանը (Տալլաս, ԱՄՆ), Հայ Աւետարանական Գոլէճը (Պէյրութ, Լիբանան), ինչպէս նաեւ անհատ ուսանողներ՝ Ճենիս Օքումեանն (Ռոտ Այլենտ, ԱՄՆ) ու Ժոզէֆ Սիրենը (Ալասքա, ԱՄՆ) կազմեցին երեւութական երգչախումբ մը ու երգեցին «Էրեբունի –Երեւան» երգը։ Երգի տեսահոլովակը հրապարակուեցաւ Հոկտեմբեր 21-ին։

ՀՀՀ-ը միջոցառումներ կազմակերպեց նաեւ ՀԲԸՄ-ի «Հայորդեաց Օր» շաբաթօրեայ դպրոցի (Մոնթրէալ, Գանատա), Մեսրոպ Մաշտոցի անուան կիրակնօրեայ դպրոցի (Մատրիտ, Սպանիա), «Հայարտուն» կրթամշակութային կեդրոնի (Թիֆլիս,Վրաստան) ուսանողներուն համար։ Հիպրիթ կրթութեան ծրագիրը համակարգող Արփինէ Թաւաքալեանը եւ արեւմտահայերէնի հեռավար ուսուցչուհի Զեփիւռ Խպլիկեանը աշակերտներուն ներկայացուցին քաղաքի անցեալն ու ներկան եւ առցանց այցելութիւն մը կազմակերպեցին դէպի քաղաքի թանգարանները ու պատմական-մշակութային վայրերը: