ՀԲԸՄ Հայկական Համացանցային Համալսարանի (ՀՀՀ) համար Փետրուար ամիսը ճոխ էր եւ արդիւնաւէտ: Փետրուարին նշեցինք Առնօ Բաբաջանեանի 105 ամեակը եւ Մայրենի լեզուի միջազգային օրը:
Ակադեմական ծրագիրներու կողքին, ՀՀՀ-ը միշտ կը կազմակերպէ այնպիսի ձեռնարկներ, որոնք հայագիտական տարբեր նիւթերով հետաքրքրուողները համախմբելու առիթ կը դառնան: Հաւատարիմ մնալով ՀԲԸՄ ՀՀՀ-ի նպատակին, այս ձեռնարկները կը միտին պահպանել հայկական ինքնութիւնը եւ խթանել հետաքրքրութիւնը հայոց լեզուի, մշակոյթի եւ պատմութեան հանդէպ:
Առնօ Բաբաջանեանին նուիրուած առցանց դասախօսութիւն
Փետրուար 28-ին, ՀԲԸՄ ՀՀՀ-ի կազմակերպութեամբ տեղի ունեցաւ յատուկ ձեռնարկ նուիրուած Առնօ Բաբաջանեանի 105 ամեակին:
ՀՀՀ-ի Կրթական հարթակին իրականացուող առցանց դասախօսութիւնը կը կրէր «Առնօ Բաբաջանեան՝ 105 ամեակ. հայկական շունչ մը՝ երաժշտութեան, ժամանակաշրջանի եւ յիշողութեան ընդմէջէն» խորագիրը: Օրուան բանախօսն էր դոկտ. Նունէ Մելիքեան: Ան «Առնօ Բաբաջանեան, Խորհրդային շրջանի հայկական ռիթմը» գիրքին հեղինակն է:
Դոկտ. Մելիքեան փոխանցեց կարեւոր տեղեկութիւններ մեծ երաժիշտի եւ երգահանի կեանքի, ստեղծագործական ուղիին մասին: Ան կրցաւ գրաւել ձեռնարկին միացած մասնակիցներու ուշադրութիւնը, ներկայացնելով հետաքրքրական տեսանիւթեր եւ պատումներ: Դասախօսութենէն ետք, տեղի ունեցաւ աշխոյժ քննարկում, հարց-պատասխանի նիստ: Աւարտին, աշխարհի տարբեր անկիւններէն միացած երաժշտասէրները ներկայացուցին իրենց միտքերը:
Ձեռնարկին կրնաք հետեւիլ սեղմելով այստեղ:
ՀՀՀ-ի Կրթական հարթակին տեղադրուած են հայկական մշակոյթին առնչուող բազմաթիւ տեղեկութիւններ եւ առցանց դասախօսութիւններու տեսերիզներ: Այս հարթակին շնորհիւ կրնաք առցանց այցելել Առնօ Բաբաջանեանի Դիլիջանի բնակարանը եւ ստանալ բազմաթիւ տեղեկութիւններ մեծ երաժիշտ-երգահանի մասին:
Հետեւեցէ՛ք ՀՀՀ Կրթական հարթակին՝ սեղմելով այստեղ:
Մայրենի լեզուի միջազգային օր
Փետրուար 21-ին, Մայրենի լեզուի միջազգային օրուան առթիւ, ՀԲԸՄ ՀՀՀ-ը պատրաստեց յատուկ տեսերիզ մը՝ հաստատութեան անձնակազմի մասնակցութեամբ: ՀՀՀ-ի աշխատակիցներուն առաջարկուեցաւ արձագանգել հետեւեալ հարցումներուն.
- 1- Գրէ՛ քեզի համար ամենէն կարեւոր բառը:
- 2- Գրէ՛ քեզի համար ամենէն գեղեցիկ բառը:
- 3- Ո՞ր բառը քեզ կը կապէ քու արմատներուդ:
Պատասխանները անմիջական էին եւ յուզիչ: Այս պարզ, բայց կարեւոր տեսերիզով ՀԲԸՄ ՀՀՀ-ը նշեց մայրենի լեզուի պահպանման կարեւորութիւնը եւ հայեցի կրթութեան անհրաժեշտութիւնը:
Տեսերիզը կրնաք դիտել սեղմելով այստեղ:
Հետեւեցէ՛ք ՀԲԸՄ ՀՀՀ-ի ընկերային ցանցի էջերուն՝ մեր ձեռնարկներուն եւ տեսերիզներուն ծանօթանալու համար:
