ՀԲԸՄ Հայկական վիրտուալ համալսարանը (ՀՎՀ) Հայաստանի Հանրապետության կրթության, գիտության, մշակույթի և սպորտի նախարարության հետ համատեղ սկսել է վեբինարների շարք ՀՎՀ Համահայկական կրթական ֆորումի հարթակում (PAEF): Վեբինարների շարքի նպատակն է ներկայացնել մանկավարժության և կրթության ժամանակակից թեմաներն ու համաշխարհային միտումները՝ ձգտելով ընդլայնել և ամրապնդել մանկավարժների և հայագիտությամբ հետաքրքրվող յուրաքանչյուրի մասնագիտական գիտելիքները:
ՀՀ կրթության, գիտության, մշակույթի և սպորտի նախարարությունը և ՀԲԸՄ Հայկական վիրտուալ համալսարանը կրկին միավորել են ուժերը՝ հումանիտար և հասարակական գիտություններում մասնագիտացած ուսուցիչներին և ուսանողներին արժեքավոր նյութեր տրամադրելու նպատակով: Մեկնարկել է հայագիտության վեբինարների երկրորդ տարին։
Տարվա առաջին վեբինարը վարել է Հայկական ճարտարապետությունն ուսումնասիրող (RAA) հիմնադրամի փոխտնօրեն Րաֆֆի Քորթոշյանը, որը ներկայացրել է իր՝ «Արցախի վտանգված քրիստոնեական հայկական ժառանգությունը» գիրքը, որում ներկայացված է տարածաշրջանի ճարտարապետական պատմությունն ու այս ժառանգության պահպանման կարևորությունը։
Երկրորդ վեբինարը տեղի է ունեցել վերջերս՝ ապրիլի 22-ին, «Հայոց ցեղասպանության ուսուցման մարտահրավերները» խորագրով, որը վարում էր Կալիֆոռնիայի Լոս Անջելեսի համալսարանի (UCLA) բանասիրական գիտությունների դոկտոր, ցեղասպանագիտության և հայ գրականության ոլորտում մեծ հեղինակություն վայելող մասնագետ Ռուբինա Փիրումյանը։
Վեբինարին քննարկվել են այն դժվարությունները, որոնք ի հայտ են գալիս Հայոց ցեղասպանության մասին դասավանդելիս։ Այդ դաժան իրադարձությունները տեղի են ունեցել Առաջին համաշխարհային պատերազմի ժամանակև դրանց հետևանքով մ Օսմանյան կայսրության ձեռքով ավելի քան մեկ միլիոն հայեր են զոհվել: Վեբինարը կարող եք դիտել այստեղ։ Այս թեման վաղուց դարձել է հակասությունների և քաղաքական զգայունության աղբյուր, քանի որ շատ երկրներ դեռևս հրաժարվում են պաշտոնապես ճանաչել կատարված իրադարձությունները որպես ցեղասպանություն:
Հայոց ցեղասպանության դասավանդման հիմնական մարտահրավերներից մեկն այն է, որ ուսանողները զոհերի և նրանց ժառանգների հանդեպ լինեն զգայուն և հարգանքով մոտենան թեմային։ Կարևոր է նաև թեմայի դասավանդումը մատչելի դարձնել փոքր երեխաներին։
Չնայած այս մարտահրավերներին՝ Փիրումյանն ընդգծեց Հայոց ցեղասպանության դասավանդման կարևորությունը ուսանողներին։ Անցյալը սովորեցնելով՝ մենք կարող ենք ավելի լավ հասկանալ ներկան և ստեղծել արդար և խաղաղ ապագա։
Վեբինարների շարքը նախաձեռնել են ՀԲԸՄ ՀՎՀ-ն և ՀՀ կրթության, գիտության, մշակույթի և սպորտի նախարարությունը։ Վեբինարների շարքը նախատեսված է մասնագիտական գիտելիքները զարգացնելու և ամրապնդելու, ինչպես նաև մանկավարժության և կրթության ժամանակակից թեմաները ներկայացնելու և քննարկելու համար: Մասնակիցների համար եզակի հնարավորություն է ձեռք բերել արժեքավոր պատկերացումներ ոլորտում վերջին հետազոտությունների և զարգացումների վերաբերյալ և կապ հաստատել այլ մասնագետների հետ։ Վեբինարը կարող եք դիտել այստեղ։
Այս տարվա վեբինարների շարքում կներկայանան նաև հյուր խոսնակներ, որոնք կկիսվեն իրենց փորձով հայագիտության հետ կապված տարբեր թեմաների շուրջ:
