Հայկական Համացանցային Համալսարանը (ՀՀՀ), ինչպէս նախորդ տարիներուն, այս տարի եւս նպաստեց Հայկական Բարեգործական Ընդհանուր Միութեան (ՀԲԸՄ) Համաշխարհայի առաջնորդութեան եւ  Սփիւռքի գործերու գլխաւոր յանձնակատարի գրասենեակի կազմակերպած «Քայլ դէպի տուն» ծրագիրներու իրականացման:

Վերոյիշեալ ծրագիրներուն նպատակն է ի մի բերել Հայաստանի եւ սփիւռքի հայ երիտասարդները՝ կրթական ծրագիրներու եւ ընկերային կապերու միջոցով: Այս առթիւ, ՀԲԸՄ ՀՀՀ-ը կազմակերպեց յատուկ ձեռնարկներ, տրամադրեց ուսումնական նիւթեր եւ առցանց կրթութեան մէջ իր ունեցած 15 տարուան փորձառութեամբ հարստացուց նշուած  ծրագիրներուն օրակարգը:  
 

Այս տարի, Յունիս 16 - Յուլիս 17 տեղի ունեցած «Համաշխարհային առաջնորդութեան ծրագիր»ին (GLP) մասնակցեցաւ 20 երիտասարդ: Բոլորն ալ ըստ իրենց մասնագիտութիւններուն հետեւեցան համապատասխան գործնական աշխատանքներուն:

Անոնք նաեւ հետեւեցան ՀԲԸՄ ՀՀՀ-ի  Արեւմտահայերէն լեզուի դասընթացքին եւ մասնակցեցան Արցախի նուիրուած առցանց ձեռնարկին Արեւմտահայերէնի բաժինի պատասխանատու՝ Զեփիւռ Խպլիկեանի եւ Աւագ հեռավար ուսուցչուհի՝ Անի Տեկիրմէնճեանի գլխաւորութեամբ:

Զեփիւռ Խպլիկեանը նշեց. ««Համաշխարհային առաջնորդութեան ծրագիր»ի մասնակիցները ՀՀՀ-ի կազմակերպած արեւմտահայերէնի դասընթացքներուն աշխուժօրէն կը հետեւէին:Անոնցմէ շատեր փափաք յայտնեցին ՀՀՀ-ի դասընթացքներուն հետեւելով բարելաւել իրենց հայերէնի իմացութինը»:

Յունիս 3- Օգոստոս 24 տեղի ունեցած «Քայլ դէպի տուն» ծրագիրին միացաւ 600 մասնակից՝ 19 երկիրներէ:  6 խումբով Հայաստան ժամանած 13-18 տարեկան պատանիներ հայկական մշակոյթը բացայայտելու եւ ուսումնասիրելու առիթն ունեցան:

Հաղորդակցութեան եւ համագործակցութեան մասնագէտ Կիմա Սերոբեան ՀԲԸՄ-ի գրասենեակէն ներս ողջունեց մասնակիցները եւ ներկայացուց ՀԲԸՄ ՀՀՀ-ի կրթական ծրագիրները, ել. դասընթացքները եւ առցանց ձեռնարկները:

Ան կ'ըսէ. «Ուրախ ենք, որ Հայաստան այցելող մասնակիցներուն հանդիպելու առիթն ունեցանք: Անոնք հետաքրքրուած էին եւ կ'ուզէին տեղեկութիւններ ստանալ ՀԲԸՄ ՀՀՀ-ի ծաւալած գործունէութեան մասին: Հպարտ ենք, որ Հայաստանը աւելի լաւ ճանչնալու եւ իրենց արմատներուն վերամիանալու ճիգին մէջ մենք ալ մեր ներդրումը ունեցանք»:  

Ամառնային ծրագիրներէն բացի, ՀԲԸՄ ՀՀՀ-ի Ամառնային ուսումնական շրջանը պահպանեց իր ճոխ եւ հաճելի ընթացքը:

Այս շրջանին, աւելի քան 900 ուսանող հետեւեցաւ Հայոց լեզուի, Հայոց պատմութեան, Հայկական մշակոյթի եւ Ճատրակի դասընթացքներուն: Առաւել, ՀԲԸՄ ՀՀՀ-ի հեռավար ուսուցչուհիները Հայաստանի ամառնային փառատօներուն նուիրուած յատուկ առցանց  ձեռնարկ մը կազմակերպեցին: 

ՀՀՀ-ի ուսանողներէն Կարապետ Վարատեանը, առցանց ձեռնարկին մասնակցելէ ետք այսպէս կը գրէ.« Շատ շնորհակալ եմ: Ձեռնարկը շատ հետաքրքրական էր: Հայաստանի ամառնային փառատօներէն շատ սիրեցի տոլմայի եւ ոչխարներու խուզման փառատօները»:

Ուրիշ ուսանող մը կ'ըսէ. « Շատ հաճելի էր: Փառատօներ կան, որոնց կ'ուզէի մասնակցիլ: Օր մը, անպայման, Հայաստան պիտի այցելեմ»:

ՀԲԸՄ ՀՀՀ-ը Ամառնային ճոխ ու յագեցած ուսումնական շրջանէն ետք կը պատրաստուի Աշնանային ուսումնական շրջանին՝  նոր եւ հաճելի ծրագիրներով:  

Արձանագրուիլ